Efren Canticus

Ap suras maza pit pianaki. Wat kaijsu kutmu pitne chin piankam chanapish. Kuisha tayatmu pit piankamtau. Aña kizna Efrain Canticus kamari kish paraamti. Kuisha Kueit kimatka mimtus. Ishnuma chatki mintaish. Kuisha charintamin. Usane paishpas izkatkakaish, pianchish. Usmikane izkatkaish. Nane wamtɨt puramat kajkit usane piankam sat mɨttau. Kuisha wat akuain.

Ishanchiras chanapan Awá amakuain, ñannu chanapan Awá amakuain. Uskasa chanaptane kuisha parashiras chanapam Awá amakuain. Wanmatta payune uskasane kuisha wanmakkit charirau. Usmikane min amakuain, chanɨtmatne tɨwilne mumatmin amakuain. Kuisha kajchiras cham Awá akuain. Mɨtakas kueit pit paramtune mɨmas. Paña tuntuin panam mɨjamakuain. Cha kakish kishkit shihtɨ kannɨmakuas. Cha kas kizmakuain. Masakane chan puztau kizmakuain, masakanane ñannɨtchikain cha parish kizmakuain, maneme pushku kizmakuain, kaizna kizmakuainte. Kaishkit ishan kuntɨ kimakuain.

Wanmattane ishankit shihtɨ kanmarɨitmakanashɨn.

Wat aña kuisha tayatish. Nukana cha Awane an sukinne karachin katna warashinai minkuarau. Sunmikane chi kisachi kamakuanaish. Chanapkimaneme cha kamakuanaish. Chanat Awáin kamakpas.

Maza payune cuchilla Alpimat ɨakanaashɨn. Nakas +mtakuas+n, sumpayune mampa +akanash+n, mampaizna chamanash+n, katsa mikua kasa chamakanash+n, sun payune Gabriel Bisbicus amakuain, uskasaizna chamakanash+nte.  Uskas paranarau kishkit kunakuain. Me, Verde izaknu pakane, piarish kuarain kishkit  tɨt anpaitkanashɨn, suane paña sau kana akuain, paña saui kizkuain; mainchimtus apu. Wat kaijsuin kumaizkanashɨn. Karain yaj kuimtu kuimtu kiitkanashɨn. Chikas mas samchi Awá amakuain. Sunkana kuatkit + kaiat+r+kanash+n.

Mawazhainmiasa maza pit piankam sawizashɨn. Paña Ashampa karɨt kizta piankamsɨn. Yawa sunkana kit chanaptɨtkas usne panamin akuain. Kajmin akuain. Suane, Nakas kaish chanaptisɨn. Kueit kirɨtka kitsɨn. Suane kaizkin. Kaizna kirɨji kizkin. Nɨjkutnukanain chanap akin. Nane mas sarachin wat kaijsu pit paratkit chanaptisɨn. Anneme chine kimchi ashɨn. Usneme ishanchirasmin chanap kakin. chanapkimane paratkit chanaptitpa makpas minsɨn.

AISHTAISH APU WAT AÑA. Up pitne mainkit chasachi makpas. Nɨjkuhkit ɨkimtu manaizpas, paratkit ɨkimtu manaizpas. Numikane kuisha papish chanatpa amakuain. Wat pampa chanatpa amakuain. Kuisha ɨtapai minkane usneme chanapmin amakuain. Kuisha ɨtapai minkane usneme tɨwil mumat panam mɨjamakuain. Wacha kaiztaneme usmikane waipamchi amakuain.

Attɨm Awá sus tayattɨt puramakpas. Karain aishtaish apu kizpuspas. Kuisha tɨnta ñankit charikin.

Wat aña, watkimain kaitarɨnka ɨnkal Awá izput puram sura. Mainkin ɨrɨt Awa kuattuz watmin sapanaji. Auruza ish chamannaka. Auruza ishkuintachin ish chamannaka.

NɨHJKUH PARAMIKA-Javier Ramiro Wanga

18 de marzo 2020